PanAlbanica ka zënë fill si një rrjet njerëzish, botëkuptimet e të cilëve nuk ravijëzohen nga kufijtë, çfarëdo qofshin ata. Thelbi i këtij rrjeti është të menduarit jashtë mureve të vendosura artificialisht në hapësirë dhe në kokat tona njëkohësisht. Andaj, motoja jonë është “Pa kufij në kokat tona”. PanAlbanica është një agorë përsiatjesh e debatesh, që do të përpiqet të japë një dorë në shembjen e këtyre mureve në botën e rrjetëzuar e tejet të ndërvarur në të cilën jetojmë sot. Që nga 17 janari 2016, PanAlbanica ka agorën e saj ku shpërfaqen përtejkumtet, përsiatjet, analizat me tejqyrë e shëmbëllimet për mbrothësinë kombëtare pa kufij në kokat tona.
Rrjeti PanAlbanica është një gur më shumë në ndërtimin e idesë së shqiptarizmës bashkëkohore. Është ky një projekt modest yni, që mendojmë dhe besojmë njëlloj në kauzën tonë kombëtare. More info relating to pokies online.
PanAlbanica është një rrjet jofitimprurës dhe mbështetet nga vetë anëtarët e saj, e që janë:
Albulena Halili
është doktorante për Marrëdhënie Ndërkombëtare në Universitetin e Tiranës. Fusha e saj hulumtuese është e përqëndruar kryesisht në marrëdhëniet transatlantike. Është hulumtuese në Institutin kërkimor “Max van der Stoel” në Universitetin e Evropës Juglindore në Tetovë. Ka magjistruar për Diplomaci dhe Marrëdhënie Ndërkombëtare me temën "Sistemi i Verajës - një rend ndërkombëtar i paqëndrueshëm". Shkruan rregullisht edhe artikuj analitikë në shtypin ditor e atë elektronik.
Blerina Demiri
është studente në studimet pasuniversitare në degën e Komunikimit Ndërkombëtar në Universitetin e Evropës Juglindore. Gjatë kohës kur vijonte mësimet në Gjimnazin e Tetovës, ka qenë kryeredaktore e revistës “Gjimnazisti”. Ka qenë dhe vazhdon të jetë pjesë e trajnimeve të shumta mbi komunikimin, artin e të folurit dhe politikën. I është bashkangjitur rrjetit PanAlbanica me të njëjtin pasion që ka për fjalën e shkruar shqipe. Gjatë studimeve, në kuadër të programit Erasmus për shkëmbim studentor, ka ndjekur studimet në Institutin Katolik të Studimeve të Larta (Institut Catholique d'Etudes Superieures) në Francë.
Bujar Sinani
Aktualisht i punësuar në Universitetin e Evropës Juglindore si përgjegjës i Zyrës për bashkëpunim ndërkombëtar, ka punuar si ligjërues i gjuhës frënge që nga viti 2002 në UEJL, ndërsa po këtë detyrë e ka ushtruar edhe në Aleancën Franceze në Tetovë, ku sot mban postin e presidentit. Mban titullin Master nga Universiteti Paris Est-Creteil në Administrim Publik dhe këmbime ndërkombëtare. Ka punuar si korrespodent sporti i gazetës “Flaka” dhe si gazetar sportiv në “Radio Tetova”. Është doktorant në Universitetin Nantes në Francë, ndërsa fusha e tij e hulumtimit është e përqendruar në paraqitjen dhe manifestimin e dhunës verbale në media.
Fatmir Arifi
është doktorant në Universitetin e Tetovës. Ka kryer studimet universitare në Fakulteti Filozofik, dega e historisë në Universitetin e Prishtinës. Studimet pasuniversitare i ka përfunduar në Universitetin e Evropës Juglindore në drejtimin Marrëdhënie Ndërkombëtare dhe Diplomaci me tezën e magjistraturës “Sfidat e rendit të ri botëror”. Është autor i shumë studimeve të botuara në revista shkencore vendore e ndërkombëtare, si dhe autor i analizave të ndryshme gjeopolitike e të tjera në mediat shqiptare.
Gurakuq Kuçi
është magjistër në Shkenca Politike: Politikë Ndërkombëtare dhe në Gazetari. Është drejtor në “Independent Institute for Political and Media Studies”. Ai ka punuar një kohë si gazetar dhe është angazhuar si bashkëpunëtor i jashtëm për ndërtimin e zyrave për media. Ka shkruar dhjetëra opinione në mediat shqiptare. Tani është i angazhuar në zhvillimin edhe të shoqërisë civile, qytetarisë aktive dhe diplomacisë publike. Gjithashtu autori ka të publikuar edhe punime shkencore përveç atyre publicistike.
Kushtrim Bekteshi
ka realizuar dhjetëra shfaqje teatrore në Maqedoni, Shqipëri, Kosovë dhe Bosnjë e Hercegovinë, si dhe dy filma të metrazhit të shkurtër dhe një film të metrazhit të gjatë. Ka kryer studimet për regji teatri dhe më pas edhe studimet e magjistraturës për skenar filmi dhe televizioni në Fakultetin e Artit Dramatik-Shkup. Shfaqjet e tij teatrore janë prezantuar në kuadër të disa festivaleve kombëtare dhe ndërkombëtare. Është shpërblyer me disa çmime për regjisor dhe për shfaqje më të mirë, ndër të cilat çmimi “Kult” për regjisor të vitit në Shqipëri (2010), për shfaqjen “Kush ka frikë nga Virginia Wolf”, e realizuar në Teatrin Kombëtar në Tiranë; çmimin për shfaqjen më të mirë të vitit në Kosovë (2015), për shfaqjen “Shërbëtori i dy zotërinjve”, shfaqje e realizuar në Teatrin e Prizrenit. Është autor i dramës “Shpresë në ikje”. Po ashtu është edhe autor dhe regjisor i filmit “Pranverë e paharruar në fashatin e harruar”. Momentalisht është docent në katedrën për regji teatri në Fakultetin e Artit Dramatik në Shkup.
Kushtrim Zendeli
gjatë vitit 2016 ka kontribuar në rubrikën Shëmbëllime në PanAlbanica. Adhurues i artit, posaçërisht atij letrar. Me profesion është mjek stomatolog nga Kërçova. Ka kryer studimet në Fakultetin e Shkencave Mjekësore në Universitetin e Tetovës. Shkruan poezi dhe prozë. Edhe pse i diplomuar në një fushë krejt të ndryshme, nuk iu nda penës, shkrimeve të ndryshme artistike dhe pjesëmarrjes në evenimente të ndryshme kulturore.
Mensur Mamuti
redaktor përgjegjës i rubrikës Gjë(ra)egjëza në PanAlbanica është inxhinier i Shkencave Kompjuterike dhe punon në UEJL, në sektorin për Dizajn dhe Multimedia. Që nga 1994 është redaktor kryesor i kuizit të diturisë, "Ramazani". Autor dhe botues i Revistës enigmatike "Rebusi". Autor dhe udhëheqës i programeve "Rebus-Bleta" dhe "Enigma" në radio të ndryshme në Tetovë. Gjatë viti 2004 ka qenë autor dhe regjisor i programit televiziv "Mix Age" në TVM. Që nga viti 2016 është redaktor përgjegjës i rubrikës enigmatike "Koha e lirë" në gazetën "Koha" që botohet në Shkup. Është autor i revistës "100 fjalëkryqe për 100 vjetorin", në 100-vjetorin e Pavarësisë.
Ramize Ferati
ka mbaruar studimet për gjermanistikë dhe përkthim në Sprachen & Dolmetscher Institut München dhe Universitetin e Prishtinës. Në kuadër të angazhimit të saj shumëvjeçar si përkthyese dhe interprete në organizata dhe institucione ndërkombëtare, nga viti 2007 është përqendruar në fushën e diplomacisë, politikës si dhe të drejtave të fëmijëve. Pas një angazhimi si mësimdhënëse në Webster Public Schools në shtetin federal Massachusetts të SHBA-ve, i është përkushtuar pedagogjisë me theks të veçantë në rolin e arsimit në zhvillimin e shoqërisë. Ka përkthyer dhe shkruar një sërë artikujsh, studimesh e hulumtimesh nga fusha e diplomacisë dhe publicistikës.
Shemsedin Ibrahimi
Pas përfundimit të Fakulteti të Gazetarisë në Tiranë, profesionin e gazetarisë e ka ushtruar në disa media lokale dhe nacionale. Fillimisht punon në radion lokale “Radio Tetova”, radio e cila gjatë Luftës së vitit 2001, luajti rol të rëndësishëm në informimin e drejtë dhe objektiv, jo vetëm në Maqedoni, por ishte burim informacioni edhe për mediat ndërkombëtare. Si korrespodent nga Tetova, ka punuar edhe në disa gazeta të njohura ditore, si “Koha Ditore”, “Lajm Maqedoni” dhe më pas edhe si korrespodent kryesor nga Tetova i Televizionit të Maqedonisë - programi në gjuhën shqipe. Aktualisht punon në Zyrën për marrëdhënie me publikun në Universitetin e Evropës Juglindore në Tetovë. Gjatë punës si gazetar, përveç lajmeve ditore ka shkruar edhe reportazhe, komente dhe shkrime hulumtuese. Shkrimet e tij të fundit në PanAlbanica kryesisht trajtojnë tema të aktualitetit politik në hapësirën shqiptare në Ballkan.
Vjollcë Berisha
është pedagoge e letërsisë shqipe në Universitetin e Tetovës dhe themeluese e Shtëpisë Botuese “Syth”. Ka magjistruar në vitin 2010 për poezinë bashkëkohore, përkatësisht për poezinë e Ismail Kadaresë, me temë “Vëllimi “Shekulli im” i Ismail Kadaresë – gjeneza e frzmëzimit dhe modeli i ligjërimit”, studim të cilin edhe e ka botuar në vitin 2018. Është doktorante në fushën e Letërsisë në Universitetin e Tiranës. Në vitin 2005 ka botuar përmbledhjen poetike “Në xhep kam një botë”. Ka botuar artikuj e studime në revista shkencore e letrare.
Xhemazije Rizvani
Është pedagoge e gjuhës dhe letërsisë. Ka punuar në Universitetin e Tetovës dhe në Shkollën “Woodrow Wilson” në Tetovë. Aktualisht është në përfundim të tezës së magjistraturës me temë “Intertekstualiteti në poezinë bashkëkohore shqipe”. Shkruan poezi e tregime. Është autore e disa artikujve, eseve dhe studimeve të botuara nga fusha e letërsisë.