NE

PanAlbanica ka zënë fill si një rrjet njerëzish, botëkuptimet e të cilëve nuk ravijëzohen nga kufijtë, çfarëdo qofshin ata. Thelbi i këtij rrjeti është të menduarit jashtë mureve të vendosura artificialisht në hapësirë dhe në kokat tona njëkohësisht. Andaj PanAlbanica është një agorë përsiatjesh e debatesh që do të përpiqet të japë një dorë në shembjen e këtyre mureve në botën e rrjetëzuar e tejet të ndërvarur në të cilën jetojmë sot. Që nga 17 janari 2016, PanAlbanica ka agorën e saj ku shpërfaqen përtejkumtet, përsiatjet, analizat me tejqyrë e shëmbëllimet për mbrothësinë kombëtare pa kufij në kokat tona.

Rrjeti PanAlbanica është jofitimprurës që mbështetet nga vetë anëtarët e saj, e që janë:

Albulena Halili


Ka magjistruar për Diplomaci dhe Marrëdhënie Ndërkombëtare me temën “Sistemi i Verajës - një rend ndërkombëtar i paqëndrueshëm”. Është doktorante për Marrëdhënie Ndërkombëtare në Universitetin e Tiranës. Fusha e saj hulumtuese është e përqëndruar kryesisht në marrëdhëniet transatlantike . Punon në Universitetin e Evropës Juglindore në Tetovë që nga viti 2007. Ndër botimet e saj të fundit shkencore radhiten: “Çështja kombëtare shqiptare – pjesa e fundit e mozaikut të pabërë ballkanik”, “Evropa PostLisboniane: Politika e jashtme e BEsë ndaj Ballkanit Perëndimor”, “Ndërtimi i sistemit ndërkombëtar sipas doktrinës së Udrou Uillsonit”, “Çështjet e pazgjidhura që u zënë rrugën integrimeve Euro-Atlantike: rasti i Ballkanit Perëndimor”, etj. Shkruan rregullisht edhe artikuj analitikë në shtypin ditor e atë elektronik.

Blerina Demiri


Është studente e vitit të dytë në degën e Komunikimit Ndërkombëtar në Universitetin e Evropës Juglindore. Gjatë kohës kur vijonte mësimet në Gjimnazin e Tetovës, ka qenë kryeredaktore e revistës “Gjimnazisti”. Ka qenë dhe vazhdon të jetë pjesë e trajnimeve të shumta mbi komunikimin, artin e të folurit dhe politikën. I është bashkangjitur rrjetit PanAlbanica me të njëjtin pasion që ka për fjalën e shkruar shqipe. Aktualisht vijon studimet në Institutin Katolik të Studimeve të Larta (Institut Catholique d’Etudes Superieures) në Francë, në kuadër të programit Erasmus për këmbim studentor.

Bujar Sinani


Aktualisht i punësuar në Universitetin e Evropës Juglindore si përgjegjës i Zyrës për bashkëpunim ndërkombëtar, Bujar Sinani ka punuar si ligjërues i gjuhës frënge që nga viti 2002 në UEJL, ndërsa po këtë detyrë e ka ushtruar edhe në Aleancën Franceze në Tetovë, ku sot mban postin e presidentit. Mban titullin Master nga Universiteti Paris Est-Creteil në Administrim publik dhe këmbime ndërkomRrjeti PanAlbanica bëtare. Ka punuar si korrespodent sporti i gazetës “Flaka” dhe si gazetar sportiv në “Radio Tetova”. Është doktorant në Universitetin Nantes në Francë, ndërsa fusha e tij e hulumtimit është e përqendruar në paraqitjen dhe manifestimin e dhunës verbale në media.

Fatmir Arifi


Është doktorant në Universitetin e Tetovës. Ka kryer studimet universitare në Fakulteti Filozofik, dega e historisë në Universitetin e Prishtinës. Studimet pasuniversitare i ka përfunduar në Universitetin e Evropës Juglindore në drejtimin Marrëdhënie Ndërkombëtare dhe Diplomaci me tezën e magjistraturës “Sfidat e rendit të ri botëror”. Është autor i shumë studimeve të botuara në revista shkencore vendore e ndërkombëtare. Po ashtu është autor i analizave të ndryshme gjeopolitike e të tjera në gazeta e revista shqiptare. Në PanAlbanica ka kontribuar kryesisht në rubrikën Me tejqyrë.

Kushtrim Bekteshi


Ka realizuar dhjetëra shfaqje teatrore në Maqedoni, Shqipëri, Kosovë dhe Bosnjë e Hercegovinë, si dhe dy filma të metrazhit të shkurtër dhe një film të metrazhit të gjatë. Ka kryer studimet për regji teatri dhe më pas edhe studimet e magjistraturës për skenar filmi dhe televizioni në Fakultetin e Artit Dramatik-Shkup. Shfaqjet e tij teatrore janë prezantuar në kuadër të disa festivaleve kombëtare dhe ndërkombëtare. Është shpërblyer me disa çmime për regjisor dhe për shfaqje më të mirë, ndër të cilat çmimi “Kult” për regjisor të vitit në Shqipëri (2010), për shfaqjen “Kush ka frikë nga Virginia Wolf”, e realizuar në Teatrin Kombëtar në Tiranë; çmimin për shfaqjen më të mirë të vitit në Kosovë (2015), për shfaqjen “Shërbëtori i dy zotërinjve”, shfaqje e realizuar në Teatrin e Prizrenit. Është autor i dramës “Shpresë në ikje”. Momentalisht është docent në katedrën për regji teatri në Fakultetin e Artit Dramatik në Shkup.

Mensur Mahmuti


Redaktor përgjegjës i rubrikës Gjë(ra) egjëza në PanAlbanica është inxhinier i Shkencave Kompjuterike dhe punon në UEJL, në sektorin për Dizajn dhe Multimedia. Që nga 1994 është redaktor kryesor i kuizit të diturisë, “Ramazani”. Autor dhe botues i Revistës enigmatike “Rebusi”. Autor dhe udhëheqës i programeve “Rebus-Bleta” dhe “Enigma” në radio të ndryshme në Tetovë. Gjatë viti 2004 ka qenë autor dhe regjisor i programit televiziv “Mix Age” në TVM. Që nga viti 2016 është redaktor përgjegjës i rubrikës enigmatike “Koha e lirë” në gazetën “Koha” që botohet në Shkup. Është autor i revistës “100 fjalëkryqe për 100 vjetorin”, në 100-vjetorin e Pavarësisë.

Shemsedin Ibrahimi


Pas përfundimit të Fakulteti të Gazetarisë në Tiranë, Shesedin Ibrahimi profesionin e gazetarisë e ka ushtruar në disa media lokale dhe nacionale. Fillimisht punon në radion lokale “Radio Tetova”, radio e cila gjatë Luftës së vitit 2001, luajti rol të rëndësishëm në informimin e drejtë dhe objektiv, jo vetëm në Maqedoni, por ishte burim informacioni edhe për mediat ndërkombëtare. Si korrespodent nga Tetova, ka punuar edhe në disa gazeta të njohura ditore, si “Koha Ditore”, “Lajm Maqedoni” dhe më pas edhe si korrespodent kryesor nga Tetova i Televizionit të Maqedonisë - programi në gjuhën shqipe. Aktualisht punon në Zyrën për marrëdhënie me publikun në Universitetin e Evropës Juglindore në Tetovë. Gjatë punës si gazetar, përveç lajmeve ditore ka shkruar edhe reportazhe, komente dhe shkrime hulumtuese. Shkrimet e tij të fundit në PanAlbanica kryesisht trajtojnë tema të aktualitetit politik në hapë- sirën shqiptare në Ballkan.

Vjollcë Berisha


Është pedagoge e letërsisë shqipe në Universitetin e Tetovës. Ka magjistruar në vitin 2010 për poezinë bashkëkohore, përkatësisht për poezinë e Ismail Kadaresë, me temë “Vëllimi “Shekulli im” i Ismail Kadaresë – gjeneza e frzmëzimit dhe modeli i ligjërimit”. Është doktorante në fushën e Letërsisë në Universitetin e Tiranës. Në vitin 2005 ka botuar përmbledhjen poetike “Në xhep kam një botë”. Ka botuar artikuj e studime në revista shkencore e letrare. Jeton në Tetovë.

Xhemazije Rizvani


Është pedagoge e gjuhës dhe letërsisë në Universitetin e Tetovës dhe në Shkollën “Woodrow Wilson” në Tetovë. Aktualisht është në përfundim të tezës së magjistraturës me temë “Intertekstualiteti në poezinë bashkëkohore shqipe”. Shkruan poezi e tregime. Është autore e disa artikujve, eseve dhe studimeve të botuara nga fusha e letërsisë.
Të gjithë ju që konsideroni se ne po mendojmë kthjellët në këtë botë të turbullt, e që edhe ju mund të bëheni një vegëz më shumë e këtij rrjeti, na shkruani:
(Visited 13 times, 1 visits today)